Bible

1 非利士人集合佢等所有个軍隊在亞弗；以色列人在耶斯列山壢个泉水滣安營。 2 五個非利士人个領袖帶等佢等个軍隊百人一隊㧯千人一隊照順序前進；大衛㧯佢个軍隊跈亞吉行在後背。 3 非利士該兜領袖看到佢等，就問：「這兜希伯來人在這位做麼介？」亞吉應講：「這係大衛，以色列王掃羅个部下。佢跈𠊎已經有幾年个時間。自從佢投靠𠊎到這下，𠊎尋毋到佢有麼介毋著。」 4 總係，非利士該兜領袖當無歡喜，就對亞吉講：「喊這個人轉你所給佢个城去！做毋得俾佢㧯𠊎等共下去作戰；佢可能在相㓾个時轉過來攻打𠊎等。做麼介犧牲𠊎等自家人个生命，俾佢重新得到佢主人个信任呢？ 5 這敢毋係大衛嗎？該兜婦女跳舞个時唱講：『掃羅㓾死千千，大衛㓾死萬萬』。敢毋係這個大衛嗎？」 6 所以，亞吉喊大衛來，對佢講：「𠊎指等永生个上主發誓：你對𠊎一直忠心；𠊎盡愛你㧯𠊎共下去作戰。對你投靠𠊎到這下，𠊎尋毋到你有麼介毋著，總係其他个領袖反對你。 7 所以，你平安轉去，免得惹佢等發譴。」 8 大衛應講：「𠊎犯了麼介毋著？若係照你所講，對𠊎來投靠你該日起，你尋毋出僕人有麼介毋著；恁樣，做麼介毋准𠊎去攻打吾主吾王个敵人呢？」 9 亞吉應大衛講：「𠊎知你在𠊎面前像上帝个天使共樣恁忠心；總係非利士人其他个領袖無愛你㧯𠊎等共下去相㓾。 10 所以，天光朝晨打早，該兜離開掃羅、也就係㧯你共下來投靠𠊎个人，你愛帶領佢等倒轉去。」 11 所以，大衛㧯佢个部下第二日打早就起身，轉非利士去。非利士人繼續向耶斯列進軍。